Upang mapabilis ang daloy ng kaalamang pang-agrikultura at mga serbisyong pang-ekstensyon, pormal nang inilunsad ang Farmers' Information and Technology Services (FITS) Kiosk sa Ilocos Sur Polytechnic State College (ISPSC) – Sta. Maria Campus noong ika-16 ng Marso 2026.
Dinaluhan ang paglulunsad ng mga pangunahing katuwang na ahensiya at institusyon, kabilang ang lokal na pamahalaan ng Sta. Maria; ang ISPSC; ang Ilocos Agriculture, Aquatic and Resources Research and Development Consortium (ILAARRDEC); at ang Department of Agriculture – Agricultural Training Institute – Regional Training Center I (DA-ATI-RTC I). Dumalo rin sa pagtitipon ang mga student leader, kinatawan ng iba’t ibang kooperatiba ng mga magsasaka sa bayan ng Sta. Maria, at iba pang stakeholder mula sa sektor ng agrikultura at pangisdaan.
Sa pagsisimula ng programa, ipinaliwanag ni Alladin C. Tabo, Information Officer II at Techno Gabay Program Focal Person ng DA-ATI-RTC I, ang layunin ng FITS Kiosk bilang bahagi ng Techno Gabay Program. Binigyang-diin niya na magsisilbing sentro ang FITS Kiosk ng mga impormasyon at teknolohiyang may kaugnayan sa agrikultura at pangisdaan. Ito ay magiging bukas sa mga magsasaka, mangingisda, mag-aaral, at iba pang miyembro ng komunidad na pinaglilingkuran ng ISPSC at ng bayan ng Sta. Maria.
Nagpahayag din ng kanilang mga mensahe ang mga pinuno at kinatawan ng mga ahensiya at institusyong dumalo sa programa. Kabilang dito si Sta. Maria Mayor Michael Florendo na personal na nagpahayag ng kanyang pagpapahalaga sa inisyatibang ito upang mapalakas ang kaalaman at kasanayan ng mga magsasaka sa bayan ng Sta. Maria, at upang matulungan silang makagawa ng mas angkop na mga desisyon para sa kanilang kabuhayang pang-agrikultura.
Samantala, nagpabatid si ISPSC President Mario P. Obrero ng kanyang pasasalamat sa mas pinaigting na kolaborasyon ng mga ahensiya at institusyon upang higit na magampanan ng unibersidad ang mahalagang papel nito sa pagsulong ng mga programang ekstensyon na nakabatay sa pananaliksik. Binigyang-diin din niya na ang FITS Kiosk ay magsisilbing tulay upang higit pang mapaunlad ang mga samahan ng lokal na magsasaka, mga kooperatiba, mga mag-aaral, at maging ang mga nagnanais maging agri-entrepreneur sa munisipyo at mga karatig-lugar.
Ibinahagi naman ng kinatawan ng ILAARRDEC na si Dr. Love Grace Campano ang mga suportang ibinibigay ng consortium para sa mga programang nakapaloob sa Techno Gabay Program. Ayon sa kanya, sa pagbubukas ng FITS Kiosk sa ISPSC at sa mas pinaigting na kolaborasyon ng mga katuwang na institusyon, inaasahang higit pang mapapalakas ang mga FITS Center sa lalawigan ng Ilocos Sur.
Nagbigay rin ng mensahe ang kinatawan ng DA-ATI-RTC I na si Dr. Maricel D. Dacapias kaugnay ng pagbubukas ng FITS Kiosk. Ayon sa kanya, magsisilbing daluyan ang FITS Kiosk ng mga napapanahon at angkop na kaalamang pang-agrikultura na makatutulong at mapakikinabangan ng komunidad ng mga magsasaka at mangingisda.
Ang pagtatatag ng FITS Kiosk sa ISPSC ay isang mahalagang hakbang tungo sa mas matibay na ugnayan ng mga ahensiya at institusyon na may iisang layunin, ang patatagin at pagyamanin ang kakayahan ng mga magsasaka at mangingisda sa pamamagitan ng mga kaalaman at teknolohiyang bunga ng pananaliksik.
