Nagsagawa ang Agricultural Training Institute–Regional Training Center 02 (ATI-RTC 02) ng FY 2026 Operational Planning noong Enero 12–13, 2025 sa ATI-RTC 02, Malasin, San Mateo, Isabela. Layunin ng aktibidad na higit pang patibayin ang mga programa, proyekto, at aktibidad ng tanggapan para sa taong 2026.
Isinagawa ang naturang operational planning upang matiyak na ang mga programa ng ATI-RTC 02 ay patuloy na tumutugon at angkop sa pangangailangan ng mga magsasaka, mangingisda, agricultural extension workers (AEWs), at mga katuwang na institusyon sa Rehiyon 02.
Ayon kay Dr. Claris Marayag-Alaska, Center Director ng ATI-RTC 02, mahalagang simulan ang taong 2026 sa malinaw na direksyon at sama-samang pagkilos. “Habang sinisimulan natin ang taong 2026, narito tayo upang tuklasin ang mga episyente at epektibong paraan upang makamit ang ating mga target. Sa dedikasyon at matibay na paninindigan, makakamit natin ang ating layunin sa Kagawaran ng Pagsasaka — Sapat na Pagkain,” ani Dr. Alaska.
Nagsilbi ang operational planning bilang mahalagang paraan upang maiugnay ang mandato ng ATI-RTC 02 sa mga prayoridad ng Kagawaran ng Agrikultura (DA), ATI Central Office, at iba pang regional stakeholders. Sa proseso, sinuri ang mga nagdaang gawain, tinukoy ang mga puwang at bagong pangangailangan, mas pinahusay ang paggamit ng mga resources, at napalakas ang koordinasyon ng mga seksyon, yunit, at program focal persons.
Pangunahing bunga ng aktibidad ang pagbuo ng isang malinaw, results-based, at maisasakatuparang FY 2026 Operational Plan ng ATI-RTC 02. Nakapaloob dito ang mga prayoridad na programa at aktibidad, malinaw na targets, timelines, at mga responsableng yunit, pati na rin ang mga sukatan para sa monitoring at evaluation, indicative budget framework, at mga natukoy na posibleng hamon at kaukulang hakbang upang matugunan ang mga ito.
Sa pamamagitan ng maayos na pagpaplano at sama-samang pakikipagtulungan, layon ng ATI-RTC 02 na higit pang mapabuti ang bisa at kalidad ng mga training at extension services nito, at makapag-ambag sa mas mataas na produktibidad, katatagan, at inklusibong paglago ng sektor ng agrikultura sa Rehiyon 02 para sa FY 2026.
