Pormal na idinaos ng DA–ATI CALABARZON ang Extension Partners’ Forum 2025 na may temang “Beyond Connections: Strengthening Extension Partnerships for Inclusive Growth.” Dinaluhan ito ng mahigit 100 extension partners mula sa iba’t ibang probinsya ng CALABARZON na nagtipon upang talakayin ang mga inobasyon, hamon, at direksyon ng extension services sa rehiyon.
Sa loob ng programa, isinagawa ang serye ng team-building at collaborative activities na naglalayong palakasin ang tiwala, koordinasyon, at kolektibong pagkilos ng extension network. Naging mahalagang bahagi rin ang pagpupulong ng Association of Region 4A Extension Partners, Inc. na pinamunuan ni G. Elmer Paolo Relente, kung saan tinalakay ang mga update, programang isusulong, at mga hakbang na magpapatibay sa extension ecosystem sa darating na taon.
Bahagi rin ng programa ang pagbibigay ng mga Certificate of Recognition sa piling extension partners na nagpakita ng kahusayan, dedikasyon, at natatanging kontribusyon sa kani-kanilang mga komunidad. Ang pagkilalang ito ay patunay ng kanilang mahalagang papel sa paglakas ng extension services sa buong rehiyon.
Isa sa pinakamakasaysayang bahagi ng forum ang mensahe ni Center Director Dr. Rolando V. Maningas, na nagpahatid ng taos-pusong pasasalamat at pagpapatibay sa extension community. Ani niya, “Malaki ang nagagawa ng ating matatag na ugnayan—ito ang sandata natin upang maisakatuparan ang ating hangarin para sa pagpapalakas ng agrikultura sa CALABARZON. Patuloy tayong aangat kung patuloy ang ating pag-unlad nang sama-sama.”
Sa pagtatapos ng forum, muling tiniyak ng DA–ATI CALABARZON ang patuloy na pagsuporta sa extension partners sa pamamagitan ng mas pinatibay na koordinasyon, capacity-building initiatives, at mga programang nakatuon sa inklusibong pag-unlad ng sektor ng agrikultura.
Ang Extension Partners’ Forum 2025 ay nagpatunay na sa CALABARZON, ang pagkakaisa at iisang layunin ay nagbubunsod ng mas matatag na extension network—mas handa, mas konektado, at mas epektibong naglilingkod sa mga magsasaka.
